Is é an tSraith Shinsearach (meánoideachas uachtarach) an tréimhse neamh-éigeantach oideachais agus is gnách daltaí a bheith idir 15 agus 18 mbliana d'aois lena linn. Is iad aidhmeanna na sraithe sinsearaí leanúnachas leis an tsraith shóisearach a chur ar fáil, cabhrú le daltaí forbairt mar dhaoine agus iad a ullmhú do dhúshláin an bhreisoideachais agus an ardoideachais, do shaol na hoibre agus do shaol an tsaoránaigh.
Is é rogha an dalta sraithe sinsearaí é clár dhá bhliain nó clár trí bliana a dhéanamh. Roghnaíonn daltaí áirithe Idirbhliain a dhéanamh sula dtosaíonn siad ar chúrsa dhá bhliain na hArdteistiméireachta. Déanann formhór na ndaltaí an Ardteistiméireacht (Bhunaithe) ar chríoch an chúrsa sin dóibh. Bunaítear an próiseas roghnúcháin le haghaidh cúrsaí breisoideachais agus ardoideachais ar thorthaí na ndaltaí sa scrúdú seo. Tá daltaí eile ann a roghnaíonn Gairmchlár na hArdteistiméireachta a dhéanamh, clár ina ndírítear ar oideachas fiontraíochta agus ar dhaltaí a ullmhú do shaol na hoibre. Daltaí ar mian leo clár atá dírithe níos mó ar an bhfoghlaimeoir ná ar shaol na hoibre a dhéanamh, roghnaíonn siad an Ardteistiméireacht Fheidhmeach.