An Ardteistiméireacht Fheidhmeach

Clár Ardteistiméireachta glanscartha atá san Ardteistiméireacht Fheidhmeach, a tugadh isteach i 1995. Clár réamhghairmiúil atá ann, do dhaltaí nach mbíonn ag iarraidh dul díreach le hardoideachas nó nach bhfreastalaíonn an dá chlár Ardteistiméireachta eile go hiomlán ar a gcuid riachtanas, a n-éirim ná a gcuid stíleanna foghlama. Bíonn rannpháirtithe na hArdteistiméireachta Feidhmí ag plé go príomha le hobair agus staidéar atá gníomhach, praiticiúil agus dalta-lárnach.

Aidhmeanna agus Prionsabail

Is é príomhaidhm chlár na hArdteistiméireachta Feidhmí, na rannpháirtithe a ullmhú don aistriú ó shaol na scoile/an ionaid isteach i saol aosaigh agus saol na hoibre.

is é forbairt scileanna litearthachta agus uimhríochta na rannpháirtithe príomhchuspóir an chláir
leagtar béim ar leith sa chlár ar fhorbairt phearsanta agus shóisialta na rannpháirtithe
cuirtear deiseanna ar fáil chun próisis fhéinluachála agus mhachnaimh na ndaltaí a fhorbairt
spreagtar naisc phobail láidre chun an scoil nó an t-ionad a chomhlánú mar láithreán foghlama
cothaítear úsáid raon leathan modheolaíochtaí foghlama, mar aon leis an bhfoghlaim rannpháirteach-lárnach
cuirtear deiseanna breisoideachais agus breisoiliúna ar fáil.

Gnéithe an Chláir

Clár dhá bhliain atá san Ardteistiméireacht Fheidhmheach, agus é déanta suas de raon cúrsaí atá leagtha amach thart ar thrí ghné:

Ullmhú Gairmiúil
Gairmoideachas
Oideachas Ginearálta

Tá na cúrsaí leagtha amach ar bhonn modúlach agus tá fad tríocha uair an chloig iontu. Bíonn gach bliain de dhá bhliain an chláir roinnte ina dhá sheisiún (Meán Fómhair go hEanáir agus Feabhra go Bealtaine). Caithfidh na foghlaimeoirí 44 modúl san iomlán a ghlacadh. Ní mór dóibh seacht dTasc Dalta a chur i gcrích i gcaitheamh dhá bhliain an chláir chomh maith.

ULLMHÚ GAIRMIÚIL
Cúrsa	Líon na Modúl
Ullmhú agus treoir ghairmiúil	8
Béarla agus Cumarsáid	4
GAIRMOIDEACHAS
Cúrsa	Líon na Modúl
Gairmspeisialtóireachtaí (2 chúrsa iomlána)	8 (4x2)
Feidhmithe Matamaitice	4
Cúrsa tosaigh idTeicneolaíocht Faisnéise agus Cumarsáide	2
OIDEACHAS GINEARÁLTA
Cúrsa	Líon na Modúl
Oideachas Sóisialta	6
Teangacha: Gaeilge Nua-Theanga Eorpach nó Teanga Chomharthaíochta	2 2
Oideachas na nEalaíon (Damhsa, Drámaíocht, Ceol, na hAmharcealaíona)	2
Fóillíocht agus Áineas (Corpoideachas san áireamh)	2
Cúrsa	Líon na Modúl
Modúil roghnacha	4
Iomlán	44

Measúnacht

Bailíonn na foghlaimeoirí creidiúintí de réir mar a chuireann siad a n-obair chúrsa i gcrích. Is féidir 200 creidiúint san iomlán a bhailiú.

Mar seo a leanas a bhronntar na creidiúintí:

An modh measúnachta	Líon na gcreidiúintí
Cúrsaí arna gcur i gcrích	62
Tascanna daltaí	70
Scrúduithe	68
Iomlán	200

Bronntar teastais ar thrí leibhéal: Gradam(170-200 creidiúint): Fiúntas (140-169 creidiúint); Pas (120–139 creidiúint). Daltaí a thuilleann faoi bhun 120 creidiúint, faigheann siad Taifead Eispéiris.

Tá mór-athbhreithniú á dhéanamh faoi láthair ag an CNCM ar an Ardteistiméireacht Fheidhmeach, mar aon le cláir eile na sraithe sinsearaí.